(ត្បូងឃ្មុំ)៖នាព្រឹកថ្ងៃទី១៤ ខែមិថុនា ឆ្នាំ២០២៣ រដ្ឋបាលខេត្តត្បូងឃ្មុំ និងមន្ទីរសេដ្ឋកិច្ច និងហិរញ្ញវត្ថុខេត្តត្បូងឃ្មុំ បានរៀបចំកិច្ចប្រជុំពិនិត្យផ្គូរផ្គងនិងវាយតម្លៃលើការរៀបចំ និងការគ្រប់គ្រងបញ្ជីសារពើភណ្ឌ ទ្រព្យសម្បត្តិរដ្ឋ (តារាងកើនឡើង និងថយចុះនូវទ្រព្យសម្បត្តិរដ្ឋប្រចាំឆ្នាំ២០២២) របស់រដ្ឋបាលខេត្ត ក្រុង ស្រុក ឃុំ សង្កាត់ និងមន្ទីរ អង្គភាពថ្នាក់មូលដ្ឋាននៃខេត្តត្បូងឃ្មុំ។

កិច្ចប្រជុំនេះធ្វើឡើងនៅសាលប្រជុំមន្ទីរសុខាភិបាលខេត្តត្បូងឃ្មុំ ក្រោមអធិបតីភាពឯកឧត្តម សៀក សុភ័គ អគ្គនាយករង នៃអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធ នៃក្រសួងសេដ្ឋកិច្ច និងហិរញ្ញវត្ថុ។

នៅក្នុងកិច្ចប្រជុំនោះ លោកប្រធានមន្ទីរសេដ្ឋកិច្ច និងហិរញ្ញវត្ថុខេត្តបានលើកឡើងអំពីការយកចិត្តទុកដាក់របស់រាជរដ្ឋាភិបាល ជាពិសេសក្រសួងសេដ្ឋកិច្ច និងហិរញ្ញវត្ថុជាសេនាធិការ ក្នុងការពង្រឹងការគ្រប់គ្រង និងប្រើប្រាស់ទ្រព្យសម្បតិ្តរដ្ឋប្រកបដោយ ប្រសិទ្ធភាព តម្លាភាព និងស័ក្តិសិទ្ធភាពដោយបានដាក់បញ្ចូលការគ្រប់គ្រង បញ្ជីសារពើភណ្ឌ នេះទៅក្នុង កម្មវិធីកំណែទម្រងប្រព័ន្ធហិរញ្ញវត្ថុសាធារណៈ ដែលតម្រូវឲ្យគ្រប់អង្គភាពនីមួយៗ ត្រូវយកចិត្តទុកដាក់ខ្ពស់ក្នុងការរៀបចំបញ្ជីសារពើភណ្ឌទ្រព្យសម្បត្តិរដ្ឋរបស់ខ្លួនឲ្យបានត្រឹមត្រូវ និងទាន់ពេលវេលា ។ជាពិសេសក្រុង ស្រុក ឃុំ សង្កាត់ ត្រូវរៀបចំបញ្ជីសារពើភណ្ឌរបស់ខ្លួនដោយប្រើប្រាស់នូវប្រព័ន្ធ បច្ចេកវិទ្យាព័ត៌មានគ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋហៅកាត់ថាSARMIS ដើម្បីជួយសម្រួលដល់ការកត់ត្រា និងគ្រប់គ្រងបញ្ជីសារពើភណ្ឌ។