ពិធីប្រកាសដាក់ឱ្យអនុវត្តចក្ខុវិស័យនិងយុទ្ធសាស្ត្រស្តីពីសុខដុមនីយកម្មកិច្ចការកែទម្រង់គន្លឹះនៃរាជរដ្ឋាភិបាល

អ្នកនិពន្ធ: admin
កាលបរិច្ឆេទ: ថ្ងៃអង្គារ ទី០៨ ខែកក្កដា ឆ្នាំ ២០២៥

នាព្រឹកថ្ងៃអង្គារ ១៣កើត ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៨ ខែកក្កដា ឆ្នាំ២០២៥ នៅសណ្ឋាគារ សូហ្វីតែល ភ្នំពេញ ភូគីត្រា,លោកគីម ទិត្យា ប្រធានមន្ទីរសេដ្ឋកិច្ច និងហិរញ្ញវត្ថុខេត្តត្បូងឃ្មុំ បានអញ្ជើញចូលរួមក្នុង“ពិធីប្រកាសដាក់ឱ្យអនុវត្តចក្ខុវិស័យនិងយុទ្ធសាស្ត្រស្តីពីសុខដុមនីយកម្មកិច្ចការកែទម្រង់គន្លឹះនៃរាជរដ្ឋាភិបាល” ក្រោមអធិបតីដ៏ខ្ពងខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ តំណាងដ៏ខ្ពងខ្ពស់ សម្តេចមហាបវធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ពិធីប្រកាសនេះ ត្រូវបានរៀបចំឡើងក្រោមការសម្របសម្រួល និងកិច្ចសហការជិតស្និទ្ធរវាងអគ្គលេខាធិការដ្ឋាន នៃគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ, លេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ, អគ្គលេខាធិការដ្ឋាន នៃគណៈកម្មាធិការកែទម្រង់រដ្ឋបាលសាធារណៈ, អគ្គលេខាធិការដ្ឋាន នៃគណៈកម្មាធិការដឹកនាំការកែទម្រង់ប្រព័ន្ធយុត្តិធម៌, និងអគ្គលេខាធិការដ្ឋាន នៃគណៈកម្មាធិការដឹកនាំការកែទម្រង់ច្បាប់។

ចក្ខុវិស័យនិងយុទ្ធសាស្ត្រស្តីពីសុខដុមនីយកម្មកិច្ចការកែទម្រង់គន្លឹះនៃរាជរដ្ឋាភិបាល ឆ្លុះបញ្ចាំងអំពីនិរន្តរភាពជាគោលនយោបាយនៃការកែទម្រង់និងសុខដុមភាពជាយុទ្ធសាស្រ្តនៃកិច្ចការកែទម្រង់ដោយផ្អែកលើសមិទ្ធផលនិងបទពិសោធន៍ ស្របតាមទស្សនវិស័យ ជវភាពនៃប្រព័ន្ធតួអង្គតែមួយ ដែលជាមូលដ្ឋានឈានឆ្ពោះទៅសម្រេចបាននូវគោលនយោបាយនិងយុទ្ធសាស្រ្តបញ្ចកោណ ដំណាក់កាលទី១ រាជរដ្ឋាភិបាលនីតិកាលទី៧ នៃរដ្ឋសភា។

ជាពិសេស ចក្ខុវិស័យនេះ នឹងក្លាយជាប្រទីបបំភ្លឺមាគ៌ាប្រសិទ្ធភាពនៃការកែទម្រង់ នៅពេលដែលយុទ្ធសាស្រ្តត្រូវបានកែផ្លាស់ឱ្យក្លាយជាលទ្ធផលជាក់ស្តែងជាឧត្តមប្រយោជន៍ដល់ស្ថាប័នសាធារណៈ សេវាសាធារណៈ និងសេចក្តីសុខរបស់ប្រជាពលរដ្ឋ។

ពិធីប្រកាសដាក់ឱ្យអនុវត្តចក្ខុវិស័យនិងយុទ្ធសាស្ត្រ មានការអញ្ជើញចូលរួមពី ឯកឧត្តមឧបនាយករដ្ឋមន្រ្តី, ឯកឧត្តមទេសរដ្ឋមន្រ្តី, ឯកឧត្តមរដ្ឋមន្រ្តី, ឯកឧត្តមរដ្ឋមន្ត្រីប្រតិភូអមនាយករដ្ឋមន្រ្តី, ថ្នាក់ដឹកនាំ ក្រសួង ស្ថាប័ន, ការដ្ឋានកែទម្រង់ទាំង៥, គណៈអភិបាលរាជធានី ខេត្ត, មន្ទីរសេដ្ឋកិច្ចនិងហិរញ្ញវត្ថុរាជធានី ខេត្ត, និងអង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ សរុបចំនួន ៥០០រូប។